الرئيسية / بالفلاقي / قصة حب من طرف واحد : كمال “المسوّس”

قصة حب من طرف واحد : كمال “المسوّس”




كمال “المسوّس” شاب تونسي ماعادش في مقتبل العمر برشة، على ما أظن أصيل منطقة مطماطة الجميلة، خفيف روح و صاحب نكتة و ديما الإبتسامة تعلو محيّاه.. شهر المسوّس خاطر وجهو محفّر حفر حفر أعظم من كيّاسات تونس، تقول لوحة قديمة في حانوت حبيب النجّار..
كمال مايفوتش الميترو و سبعين، يعمل في الستين خمسة و ستين كيلو، شعرو أحرش برشة لدرجة انو يقوم بيه الصباح ممشوط حاضر باش، لونو قمحي cafard و سنّيه فيهم كوش كحلة من الدخان و القهاوي.. الحاصيلو سنّيه ينجّم يعصر بيهم express bien serrée…
أمور mode وخيّنا بعيد عالخزمة برشة، مريول ولا شوميز، اي حاجة راهو لازم يدخّلها تحت السروال ما تحيكلو حتّى حكاية.. و علاقتو بالتكنولوجيا كيما علاقة Obama بالعيد الكبير.. اكا المرّة قال لإيهاب (طفل صغير يقرا ثامنة اساسي عائلتو الشيطان يكون منهم من قريب) باش يحطّلو غناية فيراج سونري ياخي حطّلو صوت توحويح ممثلة إباحيّة… و لكم ان تتخيلوا كل مرة يضرب فيها التليفون شنوّة يصير هعهعهعهعهعهع
الحاصيلو فتتكم بالحديث، كمال أول ما جاء لتونس خدم برشة عند لافاج و طردوه، طرّدوه خاطر مرة غسل كرهبة متاع client و مشى يبزنس بيها بحذا الليسي ياخي فاق بيه ولد اخت مولى الكرهبة..
الحاصيلو كمّولة بقى مديدة بطال و بعد عندهم شكون قريبهم توفّى ياخي حطّوه في بلاصتو يخدم في العطرية متاعهم لي في نهج جمال الدين الأفغاني..
و كيما اي شاب تونسي فاضي شغل، كان داه و شواه في النساء.. أعطيه يشم ريحة الأنثى يبيع لي وراه و لي قدّامو…
عاد حتّى كان دخلنا حديث في حديث، فمة بنيّة في الحومة الله و أحد على تبارك الله، القمر نهار 14 يغير منها موش لعب.. نجلاء الطبيبة.. مهبّلة الحومة كاملة كبار و صغار.. تي القطاطس هي تمشي و هوما يتبّعوا فيها..
نجلاء ظاهرلي dermatologue، طبيبة من الباهين اكالي يخلصوا الضرائب و يحبوا المناطق الداخلية هعهعهعهعهعهع، تعمل 185 cm هكّاكة عينيها كي تغزرلك وحدك وحدك تهبط عينيك و تسكت في هذا المعبد من الجمال الأخّاذ، فهي ملكة القد المقدود و القوام الممشوق… يا ولدي غزالة على حالها..
نجلاء بكلمتين الحاصيلو تنجم تخلّي داعش يوليوا Peace&Love..
الراجل ما يتحڨرش و ما يعيبوا كان جيبو و بلابلابلا… ياكاهاو سي كمال رغملي ڨلبو كبير و يحب بنات الحومة الكل إلّا أنو نجلاء أسرت قلبه.. كل ما تدخل للعطار باش تاخو باڨات ولا حاجة يقلها : وينك هالغيبة “توحشناك” طل عادة و يبدا يتلوبق و هي تاخوا فيه على قد قلبو.. هي تخرج و هو يتڨضف يسكّر الباب باش ريحة ال parfum متاعها ما تخرجش.. اي واحد يحكيلو عليها حكاية يولي صاحبو.. من جرة نجلاء و القصص الوهمية لي على نجلاء الي دبر سويڨرات و لي شرب ڨازوز و لي خذا حكيكة جال.. كل قدير و قدرو.





مرة نجلاء حبت تصبّ دينار في تاليفونها عمك كمال خدّم مخو قالها ماعناش تيكيات و عنا كان لايت و ذلك جزء من مخطط شيطاني باش ياخو نومروها و يكلمها بعد يقلها : آ نجلاء راني نحبك طوخذيني تربحيني آ آ آ نجلااااا
مدتلو الاثناشنميا قعد باهت في كف يديها الغوز و الفرني الاحمر المزيان و ريڨتو سايلة.. خرجت نجلاء بالصدفة يدخل إيهاب ولد دار الشيطان باش ياخو كيلو سكر.. حتى هي ام إيهاب تبارك الله شلاغمها يعملو مريول صوف موش تفدليك.
– آه مسوّس قاتلك ما كيلو سكر!
– نديدك تطيح في القدر؟! و الله كان ما جيتش نعزّك كي خويا راك ريت شنعملك!!
– مشني خوك و هات السكر فيسع خنمشي
– أسمعني هوبة برجوليّة تقيّدلي النومرو هذا في التليفون؟
” بالطبيعة نومرو نجلاء معروف في الحومة، إيهاب شاف النومرو عينيه لمعو لمعان”
– تراه تاليفونك باهي فيسع امي تستنى فيا!
خذا إيهاب التليفون، قيّد الإسم نجلاء و في بلاصة النومرو حط نومرو “بو نكتة” رئيس مركز خزندار.. السيد صاحب بوه بلڨدا و بوه حفّظو النومرو على مشكلة على حاجة.

الحاصيلو، الخميس الموافق ل 21 ماي 2015، نجلاء تعمل في كعبات هي و صاحبها في ال Carpe Diem و كمال يعمل في آپالات لبو نكتة و يبعثلو في ميساجات كلمنا يا عسل و ارقد لا نجيك.

 



اضف رد

لن يتم نشر البريد الإلكتروني . الحقول المطلوبة مشار لها بـ *

*